O kalinislinisan a Indu ning Dios at Indu mi naman.
Reina ning banua ampon yatu,
kapagmulalan a Virgen de los Remedios,
antimong malugud a anak, a makapadurut king trono mu
at makasiklaud arap ning dangalan
a meging Indu na ka ning Dios,
kaniting aldo tutung maligaya para keka
at para kekami maragul namang tula,
tatagulaling mi keka ing pañgatau mi,
ing pibalebale mi, ing sablang meging kekami,
alañg-alañg king dakal nang pakalulu ning Dios,
ing balen mi ampon ing mabilug a provincia mi,
ba mung ampunan iting sabla at lingapan
layun pakibilang mu sanang bandi mung tune.
Manibat king banuang pakasautan mu,
nung nu ka meging Reina, siping ning Anak mu y Jesus,
itangad mu la kekami ring mata mung maka-indu
ampon maka-reina.
Ika na sana ing talapaglingap
king keyalan dang malit ding anak mi,
king kahinhinan ampon kapamintuan ding kayanakan mi
king ikasaplala ra ding balen mi,
king katahimikan ning provincia mi, a kebaitan mi
alañg-alañg king kaburian ning Dios.
Ngening miputuñgan kang korona,
antimong Reina ampon Indu ning provincia mi,
ñgening gugulisak da kang Patulunan ning Kapampañgan,
uyab ning kapasalamatan
karing dakal a kalam mu, a pigkalub mu kekami,
daraun mi ing pañgatau mi
at ing sablang apakiabutan mi
a pigkalub ning Dios para king ikanono mi
kabang maglakad kami keti king karinan ning lua.
Ing matibe ming kapanaligan yapin
ing nung miras na ing tauling aldo paglako mi keti yatu,
antimong kayablasan ning tapat ming devocion
ampon kasuyuan keka,
tañggapan mu na kami man sana,
king banuang pakasautan mu.
O Kapagmulalan a Virgen de los Remedios,
Indu ring Kapaldanan, Tula ning Kapampañgan,
bendisiunan mu kami at e mu sana kakaliñguan
king ika ing Indu ampon Patulunan ning Provincia mi.
Amen.